तू पण तयार होऊन बघ माझ्या आधी कधीतरी....
घड्याळाकडे पाहत मी दाराशी उभा राहतो,
"झालच रे आता" म्हणता म्हणता, तास सहज निघून जातो,
आरशाशी तुझ्या गुपित गप्पा कळू दे मला कधीतरी,
तू पण तयार होऊन बघ माझ्या आधी कधीतरी...
कुठली साडी, कुठले दागिने, कुठला रंग शोभतो,
प्रत्येक वेळी हा प्रश्न पुन्हा नव्याने का पडतो,
प्रत्येक रूपात तू दिसतेस सुंदर, माहीत असते तुला परि,
तू पण तयार होऊन बघ माझ्या आधी कधीतरी...
तयारी तुझी पाहताना मी कधी चिडतो कधी हसतो,
भरले कपाट तरी कपडे नाहीत, हा गोंधळ तुझा मी पाहतो,
तयार होऊन मी वाट पाहतो कधी येशील तू वेळेवरी,
तू पण तयार होऊन बघ माझ्या आधी कधीतरी...
अनुभव घ्यायचा आहे माझ्याआधी तुला तयार पहाण्याचा,
तू थांबली असताना निवांत आवरण्याचा,
वाट पाहण्याचा अनुभव तू पण घे एकदा तरी,
तू पण तयार होऊन बघ माझ्या आधी कधी तरी...
समजतो मी तुझी धडपड नीटनेटके दिसण्याची,
प्रत्येक प्रसंगी स्वतःची सर्वोत्तम प्रतिमा जपण्याची,
साज शृंगार असो वा नसो तूच माझी गोड परी,
तरी पण एकदाच, तयार होऊन बघ माझ्या आधी कधी तरी...
----- विभव जोगळेकर
No comments:
Post a Comment