नाही भरजरी वस्त्र नेसले,
लेवून साधी ही साडी,
राया तुम्हा भेटाया आले...
नाही माळला गजरा केसांत,
नाही नेत्री काजळ रेखीले,
लाजेच्या गुलाबी छटांनी,
हे गाल गुलाबी रंगले,
नाही दागिने अंगावरती,
नाही मोत्यांचे हार ल्याले,
तुमच्याच प्रेमाच्या नजरेने,
सारे रूप खुलून आले,
नाही शब्द कुठले ओठी,
नयनांनीच गीत गायिले,
हळुवार त्या कटाक्षी,
मन माझे हरपून गेले,
साज कशाला वेगळा आता,
तुमचेच प्रेम ल्याले,
लेवून साधी ही साडी,
राया तुम्हा भेटाया आले...
नजरेसमोर तू येतांच,
सारे शब्द हरवून गेले,
तुझ्या लाजाऱ्या हास्यामध्ये,
मन माझे गुंतून गेले,
साज कशाला तुज वेगळा,
देवाने ऐसे रूप घडविले,
तू असेच यावे समोरी,
अन् मी तुझ्यात हरवून जावे...
------- विभव जोगळेकर
