रात्रीस गंध रातराणीचा दरवळला, गाण्यात मान चाफ्यास मिळाला,
परी एक सखी मज सांगून गेली, तिचे आवडते फुल अबोली,
निशब्द विश्वाच्या साम्राज्याची, साम्राज्ञी ही अबोली...
नाजूक ना काही पारिजाता परी, मोगरा असावा द्वारी एकतरी,
जास्वंदीस मान, लाडकी गणेशाची, आणि सोज्वळता पहावी सोनटक्याची,
परी एक सखी मज सांगून गेली, तिचे आवडते फुल अबोली,
निशब्द विश्वाच्या साम्राज्याची, साम्राज्ञी ही अबोली... ||२||
संध्याछायेत अलगद फुलली, केशरी रंगात न्हाऊन निघाली,
गंध ना परी वेणीत सजली, शांत सौंदर्याची कोवळी अबोली,
एक सखी मज सांगून गेली, तिचे आवडते फुल अबोली,
निशब्द विश्वाच्या साम्राज्याची, साम्राज्ञी ही अबोली... ||३||
------ विभव जोगळेकर
No comments:
Post a Comment