देव विटाळला

तूम्ही होता लोकमान्य, 
परी आम्ही लोक सामान्य, 
तुमचा विचार विसरून गेलो, 
आम्ही नशेत हरवून गेलो ॥
गणपतीत एकत्र जमतो आम्ही, 
ओली पार्टी कराया नामी,
गणपतीची नाही आम्हा चाड,
पेटीत आम्हा दिसते घबाड,
तूम्ही होता लोकमान्य. .... ॥1॥
गणपती सार्वजनिक तूम्ही केला,
आम्हा एकत्र आणायला,
आम्ही गल्ली गल्लीत भांडू लागलो,
हातापाईवर ऊतरून आलो,
तूम्ही होता लोकमान्य. .. ॥ 2 ॥
गणपती जूगाराचा अड्डा बनला,
गर्दी झाली तमाशाच्या फडाला,
सार्वजनिक देव हा विटाळला,
नाही राहिले भान आम्हाला,
तूम्ही होता लोकमान्य,
परी आम्ही लोक सामान्य,
तुमचा विचार विसरून गेलो,
आम्ही नशेत हरवून गेलो ॥ 3 ॥