महालातील चोर

महालात इथे राहतो चोर,
राजा म्हणतं त्याला शेंबडं पोर,
युगायुगांची हीच कहाणी,
ज्याची सत्ता, चाले त्याचा जोर...

प्रजा ना इथली साधी भोळी,
प्रत्येकजण भाजतो आपली पोळी,
म्हणूनच राजा निवडणुकीच्या वेळी,
दारोदार फिरतो घेऊन झोळी....

"मी", "माझे" पलीकडे, 
विचार कोणी करीत नाही,
बोलायच्या गोष्टी हजार,
प्रत्यक्षात कृती काहीच नाही...

महालातील चोर एकटा नाही,
गावोगावी त्याची जात,
स्वार्थाच्या छोट्या ठिणगीने,
पेटते सहज सत्तेची वात...

दोष देऊन फक्त राजाला,
प्रश्न इथला सुटणार नाही,
आपण बदललो नाही तर,
व्यवस्था बदलणार नाही...

युगायुगांची हीच कहाणी,
बदल घडवा आधी मनात,
जसा माणूस हवा आहे,
तसा माणूस घडवा स्वतःत...

------- विभव जोगळेकर