मी पांतस्थ, वाट माझी काटेरी,
चाले निरंतर, आयुष्याची वारी...
सामान्य मी, रमातो संसारी,
संसाराचा भार उचलतो हरी,
हात राबती प्रपंची, चित्त रमते पंढरी,
चाले निरंतर, आयुष्याची वारी...
कर्मयोगी मी, रतीब कामाचा,
ओठी हरी नाम, ध्यास दर्शनाचा,
देह इथे, मन चंद्रभागे तिरी,
चाले निरंतर, आयुष्याची वारी...
ऊन सावली येती जाती, ऋतू बदलती,
सुख दुःखाच्या खेळात, तूच एक सोबती,
तूच माऊली सकलजनांची, तूच एक कैवारी,
चाले निरंतर, आयुष्याची वारी...
रूप सावळे, कर कटी तू उभा विटेवरी,
तुला शोधता पंढरपुरा, तू वससी अंतरी,
या वाटेवर तूच सोबती, तूच वारकरी,
चाले निरंतर, आयुष्याची ही वारी...
----- विभव जोगळेकर
No comments:
Post a Comment