नदी तीरावर बसले दोघे, पाण्यात पाय सोडुनी,
सूर्य तळपती डोक्यावर, अन् डोळ्यात ह्यांच्या हो रजनी!!
एक सांगतो दुसऱ्याला जरा, ऐक रे, खळखळणारे पाणी,
पाण्यामध्ये बागडणाऱ्या, मास्यांची ती गाणी,
मास्यांच्या त्या बागडण्यावर, लक्ष ठेवुनी कुणी,
सूर्य तळपती डोक्यावर, अन् डोळ्यात ह्यांच्या हो रजनी!!
ऐक रे तो, बगळा बसला, धीर - गंभीर अनुष्ठानी,
चित्त त्याचे मास्यांवरती, लाळ टपके मुखातूनी,
सूर मारून, मासा नेला, खंड्याने चोचीतूनी,
सूर्य तळपती डोक्यावर, अन् डोळ्यात ह्यांच्या हो रजनी!!
पात्यांचे ते वार झेलती, नदी ही अंगावरती,
नाव निघाली स्वार होऊनी, ऐटीत लाटांवरती,
तुषार झेलती अंगावरती, बैसुनी आंधळे किनाऱ्यावरती,
सूर्य तळपती डोक्यावर, अन् डोळ्यात ह्यांच्या हो रजनी!!
---- विभव जोगळेकर
No comments:
Post a Comment