अंतरीचा विठ्ठल

का जाऊ पंढरीला, विठूरायाच्या दर्शना,

विठू सदा माझ्या संगे, का तुम्हास दिसेना?

विठू माझा, शेतामंदी, राबतोया दिसभर,

शेताच ओझं माझ्या, माऊलीच्या पाठीवर,

गोठ्यामध्ये रखुमाई, कपिलेचे रूप घेई,

दूध पाजी या लेकरा, दुजे भाग्य काही नाही,

विठू असे तुमच्यात, का तुम्हा उमगना,

विठू सदा माझ्या संगे, का तुम्हास दिसेना?

बैसलागे विठू माझा, अगदीच दाराम्होरं,

श्वान होऊनी राखितो, आपुलेच तो मंदिर,

विठू पाणी विठू वारा, विठू आनंदाचा झरा,

जेथे जातो तेथे, संगे उभा असे तो सावळा,

विठू आस, विठू श्वास, विठू रोमारोमात भरला,

विठू सदा माझ्या संगे, का तुम्हास दिसेना?

विठू माझ्या घरी, बाळगोपाळात, 

विठू भजनात..., विठू कीर्तनात,

माझी नगरी भासे दुजी पंढरपुरी,

व्यापून राहिला... विठू चराचरी,

ठेवा तुम्ही ठेवा, विठू चरणी भाव,

विठू सदा तुम्हा संगे; दिसेल हो राव,

आता झाली सीमा, अधिक सांगवेना,

विठू सदा माझ्या संगे, का तुम्हास दिसेना?

--- विभव