जगणे

जगणे साधे विसरुन गेलो,
हसणे सारे हरवून गेलो,
जगता जगता या जगण्याचे,
कारण मी विसरुन गेलो || धृ ||
संसार हा मृगजळ परी,
संसारात मी गुंतून गेलो,
काय कमविले, काय गमविले,
हिशोब सारा विसरून गेलो ।। १ ।।
स्वप्न माझे ज्या वाटेवर,
त्या वाटेवर निघून गेलो,
ज्या वाटेवर माझी माणसं,
त्या वाटा मी विसरून गेलो ।। २ ।।
किती चाललो मला ना कळले,
कळले मला मी थकून गेलो,
स्वप्नांच्या वाटेवर मागे,
वळून पाहणे विसरून गेलो ।। ३।।
              - विभव जोगळेकर